Jeugroman: Tuimeltrein by IEB-skole voorgeskryf!

 Plaaslike skrywer se boek in skole voorgeskryf

13/02/2025

News (Kormorant) 

Plaaslike skrywer se boek in skole voorgeskryf – Kormorant

(Lees ook oor die jeugroman, Die monster in my melkskommel (René van Zyl), reg onder hierdie artikel.)

“Ek is baie opgewonde. Dit is ‘n eer wat min mense te beurt val, maar wanneer een mens in jou en jou boek glo, is dit al wat jy nodig het, sê René, wat in 2024 ‘n ATKV-Woordveertjie gewen het.

Haar jeugboek, Tuimeltrein, is vir graad-12 leerders (eerste addisionele taal, EAT) van IEB-skole (onafhanklike eksamenraad) voorgeskryf.

Tuimeltrein is reeds in sy tweede drukproses. “Dit is ‘n besondere groot voorreg,” sê sy. René skryf in verskillende genres, van samesweringsromans tot jeugboeke en romanse. Haar idee met die skryf van die boek was om tieners daarop voor te berei dat die hele lewe basies ‘n holderstebolder tuimeltreinrit is, nie net ‘n gemaklike en voorspoedige reis nie. “Daar sal hoogte- en laagtepunte wees, maar jy moet net vashou en die rit gate uit geniet. Die boek handel oor drie graad-11 leerders met niks in gemeen nie, maar wanneer hulle moet saamwerk aan ’n groeptaak en dan die ooggetuies is van ’n moord, word hulle saamgegooi op ’n wilde tuimeltreinrit. Sonder selfone en met niemand wat in hulle onskuld glo nie, moet hulle op mekaar staatmaak om te oorleef.”

Humor en spanning is vervleg om nog meer leesplesier te verskaf. Boonop speel die jeugroman in Hartbeespoort af en lesers sal die plekke wat daarin voorkom, herken. 

Volgens die bekende resensent, Anschen Conradie, is Tuimeltrein ‘n heerlike aweregse avontuurroman vir lesers van 14 jaar en ouer. “Ten spyte van die ligte aanslag lewer die roman kritiese sosiale kommentaar op die verhoudings tussen ouers en kinders, sowel as tussen tieners met uiteenlopende persoonlikhede en agtergronde, en ondersoek die basis van vertrouensverhoudings en selfaanvaarding teen die agtergrond van ‘n avontuur wat teen die tempo van ‘n tuimeltrein voortsnel. Elkeen van die drie hoofkarakters se perspektiewe word ‘n vertelruimte gegun en verseker sodoende dat die leser empatie met al drie ontwikkel – geeneen van hulle is ‘n individuele held nie, en hulle oorlewing is juis afhanklik van hulle samewerking.”

Daar word reeds beplan aan skoolopvoerings en onderwysershandleidings gebasseer op die jeugroman.

“Om te weet dat so baie tieners die boek uiteindelik gaan lees en dieper kwessies in klasverband sal bespreek, is enige skrywer se droom,” sê René.

Die boek wat reeds in sy tweede druk is, is beskikbaar by vooraanstaande boekwinkels asook by NB uitgewers.

********

DIE MONSTER IN MY MELKSKOMMEL 

(Vyf sterre gekry by #Uitdieperdsebek)

*Haar jeugboek by Lapa uitgewers, Die monster in my melkskommel, is in dieselfde jaar, 2023, uitgegee en is net so gewild onder tieners - en selfs hul ouers - die 'comic' prentjies wat op sekere bladsye verskyn verskaf aan die leser 'n lekker leeservaring en gee soms die idee dat 'n mens 'n strokiesverhaal lees. 

Hierdie verhaal vertel die storie van Lexi wat trauma moet hanteer nadat 'n inbreker haar gesin in die huis oorval het. Lexi se verbeelding ken geen perke nie terwyl sy probeer om die situasie te verwerk wat haar gesin met baie trauma gelaat het. Met humor, lekker aksietonele en 'n bietjie misterie lei René haar heldin om die situasie te kan hanteer.

#DieMonsterInMyMelkskommel – Renè van Zyl (Resensie deur Anschen Conradie) #Lapa

Monsters word nie afgeskud deur te vlug nie; hulle agtervolg jou, en herverskyn met triomfantlike verskrikking wat jou gewaande veiligheid op sy kop keer. 

Twee dae. Net twee dae na hulle aankoms in ‘n nuwe dorp om die trauma van ‘n zombie-aanval te ontvlug, verskyn daar sowaar weer ‘n monster in hulle tuin. Lexi sien hom; die 16-jarige wat haarself as hulle gesin se selfaangestelde lyfwag in die geval van ‘n zombie-aanval sien. Haar gesinslede kan hulleself nie beskerm nie; nie ten tye van Die Insident nie, en ook nie daarna nie. haar pa bestuur ‘n belaglike pers tuk-tuk as ‘n buurtwaglid; haar ma is pilbedinges en sweef op ‘n pienk wolkie wanneer sy wel wakker is, en haar boetie, Jona, was nog altyd swygsaam en op die outisme-spektrum, maar het nou bykans opgehou praat en verskyn glad nie sonder sy wolfkeps en Supermanmantel nie. 

Daarom het Lexi haar apokalips-rugsak met ‘n flits, watersuiweringstablette, batterye, ruimtekomberse, en ‘n noodhulpkissie gereed onder haar bed; gaan sy skool toe met ‘n mes en pepersproei; luister nie meer musiek nie, sodat sy kan hoor as ‘n zombie haar bekruip, en maak nie eers haar oë toe onder gebed nie. Hulle veiligheid is haar verantwoordelikheid en sy bely: ‘Ek voel nêrens veilig nie.’ (37)

Wat op die oog af lyk soos ‘n variasie op die ‘Stranger Things’-tema, is inderwaarheid ‘n diep menslike en broodnodige roman vir jong volwassenes waarin die manifestasies van post traumatiese stres-sindroom ondersoek word. Lexi se pa openbaar reeds vroeg aan die leser dat Die Insident ‘n huisroof deur ‘n rower met ‘n zombie-masker was, maar Lexi se reis om die realiteit daarvan te aanvaar, is die hart van hierdie roman. 

Die erns van hierdie tragiese situasie word afgewissel met subtiele humor. Lexi skets graag die monsters in haar kop en die roman reflekteer haar vrese deur middel van illustrasies deur Anja Venter. Die keuse van eiename is eweneens vernuftig uitgeoefen; Lexi se van is die Ingrid Jonker-bekende Valkenburg, die invloedrykste gesin se van is Rijkmann, daar is ‘n sangoma genaamd Mama Muti, en die traumasensitiewe skool waarheen sy gestuur word, is Privaat Skool Ysterplaat, akroniem PSY.

Die roman is eietyds en uiters relevant in die huidige tyd en ruimte en word sterk aanbeveel vir lesers van veertien jaar en ouer, maar ook vir hulle ouers en onderwysers.

⭐️⭐️⭐️⭐️⭐️ #Uitdieperdsebek

********

Wee Monk's Tale, the Secret of Immortality

René van Zyl - 2012 (Youth/ Action/ Adventure)

(Contact me or buy on amazon as an eBook.)

A MYSTERY, A QUEST, A COUPLE OF GUTSY TEENAGERS AGAINST ALL ODDS 795 AD: A time of superstitious beliefs and dangerous forces. When Viking marauders burn the monastery on the Scottish Island, Iona, the orphaned Shaughn (14) is forced to flee the only home he ever knew in a desperate attempt to save a precious altar Bible. Not willing to be left behind, his cripple stepbrother Connor (14) (with grand illusions of becoming a knight) and Heather (13), a superstitious, streetwise gypsy girl, accompany him on the adventure of a lifetime. Hot on the heels of the relic follows the fierce Viking, Thorvald, who is convinced that the Bible contains a secret recipe (a potion for eternal life). The escaping teenagers are cast into every imaginable medieval drama, from a bewitched castle to an encounter with a nasty Druid and even weird

Parys Gazette: Boekpraatjie -René en Anton van Zyl (Motiveringssprekers/ Skrywers)

Oud-Parysenaar en haar teoloog man gesels oor beide se nuutste pennevrug.

October 6, 2022 Liezl Scheepers, Parys Gazette 

Een van haar getroue lesers noem haar die vroulike weergawe van die skrywer, Dan Brown, koning van samesweringsrillers. Dit is vir haar ʼn besondere groot kompliment, erken sy. Maar oud-Parysenaar René van Zyl se suksesverhaal as skrywer het begin toe News sy as tuisbly ma kreatief moes begin dink om te oorleef kort ná ʼn lewenskrisis, toe haar oudste seun as peuter met breinskade gelaat is. Met die bietjie vrye tyd wat sy gehad het, het sy haar in haar skryfwerk uitgeleef, en het in 2012 ’n kinderboek gepubliseer. Daarna het 12 romans gevolg wat sy deur Lapa Uitgewers uitgegee het. Maar dit is veral vir die samesweringsriller, Die Alfadokument wat deur Lapa se Wenkbrou-been uitgegee is, wat René bekendheid voor verwerf het. Haar nuutste samesweringsriller, Die Omegakomplot, volg op Die Alfadokument, en is pas uitgegee. 

Skrywer Zelda Bezuidenhout, self ook ’n Parysenaar, het in ’n boeiende gesprek met René en haar skrywersman, Anton, die vinger op die pols gesit oor beide se nuutste pennevrug, tydens ’n gesellige middag oor ’n glasie wyn by La Vie en Rose. René het as nooi Joubert diep spore in Parys se strate getrap toe haar pa, Josua Joubert as Landbouvoorligter hier gewerk het. Haar pa is later na Potchefstroom verplaas waar René skoolgegaan en BA Kommunikasiekunde studeer het. Sy en Zelda het mekaar in 2017 by ’n Slypskool in Potchefstroom ontmoet. Oor Omegakomplot René waarsku dat hierdie gatskop heldin, Michaela Cohen, in Die Omegakomplot, ʼn taai ratel is wat haar nie laat afskrik deur ʼn psigopatiese godsdiensleier wat die wêreld wil vernietig nie. In Die Omegakomplot ontlont geloof en waansin ’n dodelike tydbom en net twee mense kan die bloedbad keer. Michaela, oftewel, Kayla, is die onortodokse leier van ʼn internasionale Christen-organisasie. Sy en haar man, Josh, ʼn oudsoldaat, is die enigste mense wat deur die nuwe Babilon-orde se bose intensies sien. As jy die eerste boek, Die Alfadokument, gelees het, weet jy dat Kayla reeds met sakke vol emosionele bagasie van ʼn surrealistiese, sektariese kleintyd sit. Nagmerries hiervan en ook van haar vyf onmenslike jare in ʼn Thaise tronk, spook snags by haar. Asof dit nie genoeg is nie, staan ‘n reïnkarnasie van haar nagmerries kamma uit die graf op, en nou wil hy haar kind gebruik in sy nuwe, berugte wêreldorde. 

Die gaste wat by René se onlangse boekbekendstelling was, is dit eens dat René, soos haar anderster heldin, uithouvermoë en vrouemoed het om so ʼn ingewikkelde tema aan te pak. Veral in ʼn tyd waarin misdaadromans die gewilde genre is. Nie net hanteer sy temas soos eindtyd-sameswerings nie, maar ook hedendaagse gevare soos virusse en psigopatiese leiers wat net in mag en geld belangstel, ongeag menselewens wat vernietig word. ʼn Leser het opgemerk dat hy veral beïndruk was met hoe sy die leser met Die Omegakomplot intrek in ʼn parallelle doolhof tussen fiksie en historiese feite. Asook hoe belangrike elemente van die vroegste beskawings sentraal aangewend word in die skep van ʼn fiktiewe, hedendaagse organisasie. Hy het ook genoem hoe René met deernis elke karakter se geloofsoortuiging, ambisie en emosionele veldslae in die boek hanteer. Ook Zelda se indrukke van Die Omegakomplot is dat René ’n verbeelde werklikheid skep wat rillings by die leser se ruggraat afstuur. Hoe ver is die mens bereid om te gaan wanneer hy of sy totaal magsbeheb word? “Die verhaal neem die leser op ’n wilde avontuur wat begin in Kaapstad en dan draai in Dubai en Kaïro. Ware feite oor die geskiedenis van verskillende gelowe is regdeur die roman verweef, en agterin die boek is daar insiggewende agtergrondnotas wat ’n ekstra dimensie aan die fiksionele verhaal gee.” “Soos alle skrywers, dink René ook aan Google as ‘haar beste pel’. Anton se kennis as teoloog was van onskatbare waarde toe sy feite oor geloofsgeskiedenis moes verifieer.” “René het ’n ryk verbeelding en skryf vreesloos en geloofwaardig oor uitdagende onderwerpe soos marteling, seks en verkragting. Die slegte ouens is régtig ontstellend sleg en die stryders van die goeie stryd het amper superhero-kwaliteite. Haar aksie- en ruimtebeskrywings is vol fyn detail en laat mens voel asof jy na ’n fliek kyk. Maak vas jou sitplekgordel, want daar is baie kinkels en draaie, en bitter min wat voorspel kan word,” skryf Zelda.

Van Kakiebos tot Kremetart Anton het as oud-Klerksdorper sy unieke lewensverhaal: Van Kakiebos tot Kremetart! gepubliseer As die seun van ’n myner pa het hy met ʼn skamele beurs en vakansiewerk op die myne, ingenieurswese in Potchefstroom gaan studeer. Kort na sy twee jaar in die weermag het hy by Yskor begin werk, en toe opgang gemaak as distriksingenieur in Eskom. Vinnig het hy sy eie konstruksiemaatskappy gestig, en vir Eskom hoogspanningslyne opgerig. Na sy seun, Sean-Jacques se virus-infeksie as peuter – en uiteindelike breinskade – het hy sy lewe drasties verander en op 40-jarige ouderdom voltyds Teologie op Tukkies gaan studeer. Vandag spog hy met ses grade, is hy ʼn predikant, Bybelkenner, entrepreneur, wêreldreisiger en skrywer. Tydens Covid-19 inperking skryf hy sy lewensverhaal – Van Kakiebos tot Kremetart. In die verhaal van sy holderstebolder lewe, en die soms té groot dinge wat hy al aangepak het, maar ook oor sy worstelings met sy lewe, sy soms té voortvarende persoonlikheid en sy God, lees jy ook iets van jou eie storie raak. Jou eie worstelinge. Dit is ’n gewone verhaal van wat gewone mense beleef. Anton self som dit raak op as hy sê – “dit is nie ’n hoofseun-boek nie. Dit is ’n lewensverhaal waarmee jy kan assosieer – met sy opdraandes en afdraandes om uiteindelik God se groter prentjie te sien waarvan jy net ’n klein deeltjie is. En uit hierdie raakplekke voel jy nie meer veroordeel nie. Sy storie is baie van ons se stories. Anton doen ook praatjies by mannekampe en kerke. 

Beide René en Anton se boeke, asook die skrywers Zelda Bezuidenhout en Leonard le Hanie se boeke is by La Vie en Rose in Parys beskikbaar. René en Zelda.

René van Zyl: Wenner van 'n ATKV-Woordveertjie 2024: Belle met die hart vol blomme (Romanse)

My glimlag loop vandag reg rondom my kop: Dié e-pos ontvang ek vanoggend: ATKV sit veer in

liefdesverhale se hoed. Dit is weer daardie tyd van die jaar – die ATKV vier skrywers, digters en dramaturge se uitsonderlike pennevrugte, toewyding en kreatiwiteit. Die ATKV-Woordveertjies bekroon jaarliks uitsonderlike prestasies rondom die Afrikaanse woord. Boekwurms wêreldwyd sal jou vertel dat min dinge ’n goeie liefdesverhaal klop, en ook in Afrikaans staan liefdesromans hul plek op boekrakke vol.

Die Prys vir Romanses word vanjaar aan Belle, met die hart vol blomme – René van Zyl (Romanza) toegeken. Volgens die beoordelaars Carol-Ann Alexander, Amanda Claasens en Kobie van Aswegen is die taalvaardigheid en gemaklike skryftrant van die skrywer deurgaans uitstaande. Die aanvangstoneel van die verhaal is besonder sterk en die leser kry dadelik insig in die gemoedstoestand van die heldin asook die rede vir haar paniek.

Die kalmte waarmee die held haar hanteer is ’n puik teenvoeter en tegelyk ’n aanduiding van sý karakter. Die verrassende einde van die eerste hoofstuk is ’n motivering om gretig verder te lees – ook die eerste van talle onverwagte wendings wat die geslaagde storielyn oplewer.

Baie geluk ook aan al die ander wenners in die ander kategorië.

Dankie aan Deo-Dané Van Der Merwe wat toestemming gegee het dat ek haar foto mag gebruik - julle twee is net eenvoudig pragtig. Toe ek die foto op facebook sien, het ek sommer inspirasie gekry om 'n boek te skryf! En kyk nou!

Beskikbaar by boekwinkels landwyd, LAPA Uitgewers, Graffiti Books en as e-boek op lapa en Amazon se blaaie. met René van Zyl, Skrywer

*******

Ek het 'n lys gaan maak van al my boeke - van die eerste jeugboek wat ek geskryf het, Wee Monk's Tale, the Secret of Immortality (aksie-avontuur) tot die nuutste Romanza wat Februarie verskyn: Storieboekheld.

Ek geniet alle genres. Sover het ek twee samesweringsromans, Die Alfadokument (Weknbrou, Lapa) en Die Omegakomplot, nog twee jeugromans, Die monster in my melkskommel (Lapa) en Tuimeltrein (NB )en sowat 15 Romanzas (Lapa). Daar is ook 'n paar bundels waarin my kortrverhale verskyn.

Twee toekennings:

ROSA/Imbalie toekenning 2020 vir Storm vol Liefde

ATKV-Woordveertjie 2024: Belle met die hart vol Blomme.

En my jeugboek, Tuimeltrein (NB) van 2023 is voorgeskryf vir IEB skole, vir matrieks (AET) vanaf 2026

Hier is 'n lys van my boeke sover. René van Zyl se gepubliseerde boeke sluit in:

- Die Alfadokument (2020, Lapa/Wenkbrou Uitgewers)

Samesweringsromans:

- Die Omegakomplot (2022, selfpubliseer)

Jeugromans: - Wee Monk’s Tale, the Secret of Immortality (2012, selfpubliseer) - Die Monster in my melkskommel (2023, Jeugroman, Lapa Uitgewers) - Tuimeltrein (2023, NB Uitgewers) – Voorgeskryf: matrieks (EAT) IEB-skole vanaf 2026. Romanzas (romanses) LAPA Uitgewers (Penguin Random House Suid-Afrika) - Liefdesafari - Alice se Ierse Sprokie - Opa vir die Liefde - Weer eens Lilly - Liefde is Wynrooi - Storm vol Liefde (SuperRomanza – wen Rosa/Imbali toekenning vir Romanse 2020) - Min of Meer 'n Meermin - Liefde in die Boendoes - Waar die Spoke Sing - Strandwolf - Sprokie vir ʼn plaaskind - Belle met die hart vol blomme (Wenner ATKV Woordveertjie 2024) - Roekeloos verlief - Die Hart soek wat hy soek - Toe Gebeur Vegas - Storieboekheld Groepromans/-projekte: Op pad na Grysberg (Naledi 2023) Fantasie. Sewe Keer Sondig (April 2024, Naledi) Spanning. Vir meer inligting oor René van Zyl en haar werke, besoek gerus haar blog: https://renevanzyl.blogspot.com/ https://www.lapa.co.za/boeke https://www.nb.co.za/en/home

2024: VOL VERRASSINGS

 Ek is baie opgewonde, want ek verwag om 'n jeugboek en twee Romanzas in 2024 uit te gee.

Ook werk ek aan my persoonlike getuienis, Grootmenskind. Dis my verhaal met Sean-Jacques, my breingestremde seun wat al 31 is vanjaar. Hy het op 15 maande oud 'n vreemde virus opgedoen wat hom met breinskade gelaat het. Soveel mense vra my na ons storie want ek deel graag snaakse staaltjies op Facebook, en glo my, daar is stories wat ons rooi van skaamte gemaak het, maar ons gesin moes deurdruk - deur die trane en lag - vir onsself en vir die situasie, al het baie mense nie verstaan nie. Ek wag vir die proefleser en sal dit later vanjaar uitgee, dalk 2025. 

Ek kan solank die eerste Romanza se voorblad deel - dit kom Juniemaand uit. Intussen hou ek my besig met skryf-skryf-skryf!

Hier is:
Toe gebeur Vegas. 

TWEE JEUGROMANS VIR 2023: DEUR RENé VAN ZYL

2023 IS 'N LEKKER JAAR!

MY NUUTSTE BOEKE IS OP DIE RAK EN BESKIKBAAR BY LAPA, OF NB OF GRAFFITIBOEKE IN PRETORIA. OOK BY BOEKWINKELS EN OP AMAZON.COM AS E-BOEKE! GENIET! 

Daar is nog 'n romanza op pad teen September - Belle, met die hart vol Blomme. Kyk uit!

DIE MONSTER IN MY MELKSKOMMEL - FEB 2023 - LAPA.CO.ZA

 

Lexi word deur ’n monster gejag. ’n Zombie … nee, ’n zombie gekruis met ’n tokkelossie. ’n Zombeloshé. Niemand glo haar nie, behalwe haar nuwe vriende by die traumasensitiewe skool waarnatoe sy nou moet gaan nadat hulle gesin aangeval is tydens ’n inbraak. Saam met Zinzi, Taliep en Michael besluit Lexi: sy gaan die monster vang en uitvind wie daaragter steek. Sy is paraat en het ’n rugsak vol wapens en planne. Maar onverwagte vriendskappe, onverwagte ontdekkings en onverwagte gevoelens laat haar als bevraagteken wat sy gedink het sy weet. Wat is waar, en wat is net in haar kop? ’n Unieke en spanningsvolle verhaal wat op ’n empatieke en humoristiese wyse sensitiewe kwessies rondom trauma behandel. René van Zyl se toetrede tot jeugfiksie is vars en vol impak.

 KORMORANT KOERANT HARTBEESPOORT

René se Monster is op die rak

16/02/2023

 

René van Zyl

Die bekende Hartbeespoort-skrywer, René van Zyl, se nuutste jeugboek is pas op die rakke, maar Die Monster in my Melkskommel is nie net vir die jeug nie – dit is een van daardie treffers wat deur oud en jonk geniet sal word.

 

“Ek is baie opgewonde oor hierdie boek omdat dit ‘n ander tema het as vorige Afrikaanse jeugverhale. Dit spreek trauma by tieners aan op ‘n humoristiese wyse. Daarom sal jongmense juis met die karakters kan identifiseer,” sê sy.

Die boek word deur uitgewers bemark as “’n unieke en spanningsvolle verhaal wat op ’n empatiese en humoristiese wyse sensitiewe kwessies rondom trauma behandel. René van Zyl se toetrede tot jeugfiksie is vars en vol impak.”

Waaroor gaan die boek? Lexi word deur ’n monster gejag. ’n Zombie … nee, ’n zombie gekruis met ’n tokkelossie. ’n Zombeloshé. Niemand glo haar nie, behalwe haar nuwe vriende by die trauma-sensitiewe skool waarnatoe sy nou moet gaan nadat hulle gesin aangeval is tydens ’n inbraak. Saam met Zinzi, Taliep en Michael besluit Lexi sy gaan die monster vang en uitvind wie en wat daaragter steek. Nie net is sy ‘n selfopgeleide Zombie-jagter nie, maar boonop is sy hoogs paraat en het ’n rugsak vol wapens en planne. Onverwagte vriendskappe, onverwagte ontdekkings en onverwagte gevoelens laat haar egter als bevraagteken wat sy gedink het sy weet. Wat is waar, en wat is net in haar kop?

Die Monster in my Melkskommel is René se tweede jeugverhaal. In 2012 is Wee Monk’s Tale, wat oor drie tieners handel wat in die Middeleeue in Ierland en Skotland met ‘n Altaar Bybel vir Vikings moet vlug, gepubliseer. Die boek is steeds as ‘n e-boek beskikbaar.

En sy het verdere goeie nuus. Haar volgende jeugboek verskyn in Julie 2023 en word deur Human & Rossouw uitgewers gepubliseer. Die boek se naam is Tuimeltrein en sy het omtrent die drie tieners in die boek laat rondhardloop vir hul lewe. Die polisie is op hul spoor omdat hulle kwansuis ‘n roomysman vermoor het, maar dit is glad nie wat gebeur het nie. Niemand glo hulle nie. Sonder hul selfone en met ouers wat net die slegste van hul dink, moet hulle bontstaan om uit die moeilikheid te bly.

Die Monster in my Melkskommel word deur Lapa/Penguin Random House uitgegee en is by toonaangewende boekwinkels beskikbaar of kan bestel word by lapa.co.za. Dit is oo as ‘n e-boek beskikbaar by Lapa en Amazon.

TUIMELTREIN (JUNIE 2023) Human & Rossouw: 

Drie graad elf leerders met totaal uiteenlopende persoonlikhede en sosiale status moet skielik voor die gereg vlug toe ʼn groeptaak ʼn horribale verkeerde rigting inslaan. Sonder selfone en met niemand wat in hul onskuld glo nie, moet Abby (langafstandatleet slash cool girl), Jasper ( gamer slash bad boy) en Henri (drama queen slash reënboogkind) voor die gereg vlug en slegs op mekaar staatmaak om hierdie tuimeltreinrit te oorleef.

Die vraag is: gaan die polisie of die eintlike moordenaar hulle eerste opspoor en watter scenario is die ergste?

Drie graad elf leerders met uiteenlopende persoonlikhede en sosiale status word gedwing om saam aan ʼn klasprojek te werk toe hulle ʼn koelbloedige moord aanskou. Skielik verander hul lewens in ʼn tuimeltreinrit en moet hulle vir hul lewe vlug. En hul moet te midde van groot persoonlikheidsverskille saamwerk om die skelm speurder, wat hulle vir die moord blameer, te uitoorlê. Skielik is hul op hul eie, sonder selfone en hul normale ondersteuningsstelsels om hul raad of hulp te gee.  

NUWE FANTASIE GROEPROMAN: OP PAD NA GRYSBERG

NUWE FANTASIE GROEPROMAN: OP PAD NA GRYSBERG! 

Harties skrywer deel van baanbrekerroman.

René van Zyl, bekende skrywer van Harties, was gekies om deel te wees van dié unieke projek waarby 22 van die land se grootste skrywers betrokke was: Op Pad na Grysberg.

Op Pad na Grysberg is ʼn baanbrekerroman waaraan 22 van die van die land se grootste Afrikaanse skywers deelgeneem – onder andere: Kerneels Breytenbach, Madelein Rust, Irna van Zyl, Annerle Barnard, Elsa Winckler, Sidney Gilroy en Jan Vermeulen. Die projek is deur die bekende skrywer, Stefaans Coetzee, geïnisieer en gelei.

Op pad na Grysberg vertel die storie van M, ʼn vrou wie se menswees deur die ongenaakbare elemente van ʼn post apokaliptiese wêreld afgetakel word. Sy rou ook, want haar seun het weggeloop om hom naby Grysberg, die mistieke baken wat bo die landskap uittroon, te gaan vestig. Een aand besluit sy om hom daar te gaan soek, maar die tog soontoe is gevaarlik en die chaotiese stofstrate van Henza, die gevreesde ravyn en die Vloek van Kirikuk wag op haar. Sal sy die moed hê om die reis te voltooi? En sal sy haar seun weer sien?

Dit is ʼn unieke fantasie groeproman deur Suid Afrika se knapste skrywers wat temas van identiteit, verbondenheid en die aard van komplekse, gedeelde menslikheid ondersoek. Elke skrywer het ʼn hoofstuk geskryf sonder om werklik te weet hoe dit gaan eindig en die uiteinde is briljant.

René is bekend vir haar samesweringsrillers, Die Alfadokument en Die Omegakomplot, asook verskeie Romanse en spog hierdie jaar met twee jeugromans: Die Monster in my Melkskommel en Tuimeltrein. Sy sê sy voel gevlei om deel te wees van hierdie grootse Grysberg-projek veral omdat sy in geselskap is van soveel befaamde skrywers. Hierdie storie gaan jou nie los nie. Dis boeiend, vol verrassings en selfs die skrywers kan nie wag om te lees hoe dit eindig nie. tertia@naledi.co.za (078 6488 616) of www.naledi.co.za – Bestellings word na u adres gekoerier R240,00 prys sluit posgeld in.

SAMESWERINGSROMANS: DIE OMEGAKOMPLOT & DIE ALFADOKUMENT

 

Die Alfadokument en Die Omegakomplot

deur René van Zyl

(Wenner van Rosa Imbali toekenning vir uitmuntende skryfwerk 2020)

2 SAMESWERINGSROMANS WAAR GELOOF, MAG EN WAANSIN 'N DODELIKE TYDBOM ONTLONT ...

 

Kan twee gewone Christene, wat veg met hul eie emosionele trauma, die mensdom red van magtige sg. ‘Christen’ organisasies en hul vernietigende dwaalleer?

Beide samesweringsrillers is spannende verhale, belaai met flink aksietonele, intense intriges en onverwagte verrassings. Die leser word ingetrek in ʼn parallelle doolhof tussen fiksie en historiese feite terwyl fiktiewe, hedendaagse organisasies oortuigend weergegee word. Die leser word met deernis ingetrek by elke karakter se geloofsoortuigings en ambisie terwyl etiese kwessies realisties belig word.

BESKIKBAAR BY:

imaginemoonstones@gmail.com  of  0823964100

 www.Graffitibooks.co.za  / From Ssack to Sanctuary (Klerksdorp)

of La Vie En Rose (Parys)

Amazon.com - e-boek

Berig: Kormorant, Hartbeespoort. 

Hartbeespoort-skrywer se nuwe boek is hier. 14/07/2022

Na die sukses van haar eerste sameswering-roman, Die Alfadokument in 2020, het die bekende Hartbeespoort-skrywer René van Zyl, in volle vaart weggetrek met die aksiebelaaide opvolg, die Omegakomplot wat nou uitgereik is.

“Die boek kan losstaande van sy voorganger gelees word, maar jy gaan baie nuuskierig raak en die vorige een wil koop, wees gewaarsku,” sê René.

” Dit is ʼn  spannende verhaal waarin geloof en waansin ontmoet en ʼn  dodelike tydbom ontlont,” sê sy.

Volgens die bekende skrywer en joernalis, Erla Diedericks, is die Omegakomplot is ʼn “briljante, spanningsvolle riller met sy wortels in die geskiedenis, navorsing en ʼn  toekomsvisie wat dalk meer werklik is as wat ons besef.”

René, is ʼn oud-joernalis, wat ook bekend is vir haar gemeenskapsmusiekblyspele. Sy het reeds 15 romanse geskryf wat deur Lapa uitgegee is, asook Die Alfadokument, ʼn  samesweringsriller. Haar eerste aksie-avontuurverhaal, Wee Monk’s Tale, the Secret of Immortality, het in 2012 ook groot sukses behaal.

ʼn  Boekbekendstelling vir Die Omegakomplot het plaasgevind op 3 Augustus om 17:00 by Kuierkidz Kuiertuin Skemerberg Hartbeespoort plaas. Kontak René by
082 396 4100.