EMMERSKOPPERS

Emmerskop Wêreldhoppers

Deur Anton en René van Zyl (50-plussers, maar steeds woelige studente in ons harte!)

GOEDKOOP TOERWENKE - EN AS JY WIL IS ONS OOK TOER-METGESELLE!

Soek jy wenke vir goedkoop oorsee toer?

Of jy het geld maar soek jy iemand om saam met jou te toer want jy is te:
-Bang / vreesbevange
-Deurmekaar / angstig
-Ringtingbedinges
-Oud en sien nie kans vir 'n rugsaktoer of om die vreemde self aan te pak nie
-Geremd / of sit met fobies
??????

   Ek en my man, Anton, het al vriende met bogenoemde probleme vergesel en die hele toer vir hulle beplan, gereël, saam met hulle getoer, die motor bestuur, koffie saamgedra, as toergidse opgetree en goeie geselskap gewees. En hul steeds baie geld gespaar en die beste ervaring in elke land gegee waar ons was. (Hulle betaal en ons vergesel!) Soms nie.
   Ek en Anton was al in 35 lande op ons eie en in 4 kontinente. Ons het dus al 'n paar dinge geleer. Ons was al op verskillende soorte toere - met 'n kampeerwa, skeepsreise, bustoere, maar meeste van als toer ons met 'n gehuurde motor en ry waar en wanneer ons wil. En daar is nog n legio lande waarheen ons wil toer. Op ons laaste toer was ons vir agtien dae in Oos-Europa: Vanaf Wenen, na Praag, Bratislava (Slovakia), Budapest, regoor Croatia (Zagreb, Split, Dubrovnik, Rovijn), Trieste in Italie, Ljubjana (Slovenië) en iewers is ons ook deur Bosnie-Herzogovenia).   
   Anton is n informele, gemaklike, oopkop predikant wat al alles onder die son aangehoor het en dit moes hanteer het, hy het 6 grade waaronder Ingenieurswese (+M-graad) en 4 Teologiegrade, waaronder M-grade in Teologie, Antieke Tale, Gesinsberading. Ek het 'n BA Kommunikasiekunde Honeursgraad, is 'n skrywer, kunstenaar, opvoeder en kan jou besig hou met my geselsies as jy daarna soek!
   Ons doen dinge gewoonlik goedkoop en gemaklik.

Ek het 'n nuwe facebook blad begin vir mense wat wenke wil hê vir goedkoop toer. @emmerskoppers

Emmerskop Wêreldhoppers.

HIER IS N PAAR IDEES: 

Laat ek verduidelik wat goedkoop beteken. Wat dit nie beteken nie, is dit: dis nie ʼn georganiseerde toer in ʼn lugverkoelde bus nie. Dis nie ʼn toer wat deur ʼn reisagent gereël word nie. Ek self bespreek alles oor die internet, druk dit uit en maak ʼn lekker dik boek daarvan en ek stoor alles ook op my Dropbox op die internet sodat ek enige plek in die wêreld met ʼn rekenaar, selfs op my foon, daarop kan ingaan. (Sou alles uiteindelik gesteel word, kan ek steeds afdrukke maak vanaf Dropbox by ʼn internetkafee.)

Ek google al ʼn jaar voor die tyd elke denkbare lugredery en vliegkaartjie en soek die goedkoopste opsie. Ek kies datums wat buite hoogseisoene val sodat die reis en alle verblyfkostes ook goedkoper is. Dis is tye soos Maart tot Mei of Augustus/September. Dan is die gewilde plekke ook nie so volgepak met toeriste nie. En die paaie is minder besig. Ons huur ʼn motor aanlyn en ry self waar ons wil wees. (Busse en treine is goedkoper maar hemel, die gesukkel met tasse is te erg. Selfs ek daal nie so laag nie, veral nie met klein kinders wat jy moet help dra nie.) Ons slaap in jeugherberge. ʼn Kamer vir vier met twee stapelbeddens waarin jy skaars kan omdraai, maar dis goedkoop en soms is selfs ʼn ontbytjie ingesluit. Soms slaap ons selfs in kastele wat jeugherberge is of in een iewers langs die see met die mooiste uitsigte. Lekker man. Ek het nog nooit in enige land in Europa soveel betaal soos vir ʼn gastehuis, hotel of B&B in Suid-Afrika nie. Ek gaan vir goedkoop. Die eenvoudigste slaapplekke. In Engeland was die Travelodges selfs op ʼn stadium goedkoop maar ek kry deesdae beter opsies op Booking.com. Dis my booking engin van keuse – Maklik. Maklik. Maklik. En Gebruikersvriendelik. Daar is van die goedkoopste opsies tot die duurstes. Jy kan van tente tot vyfsterhotelle daar bespreek. Stel net jou keuselys wanneer jy soek en dit gee jou al die opsies. Ek kies goedkoopste en werk van daar af deur tot ek een kry wat by my behoeftes pas – en gewoonlik kies ek dan een in die oudorp sodat ʼn mens te voet kan loop waar jy wil. Selfs in die middel van Rome kry jy goedkoop opsies. Ek het nie fiemies nie. As die meeste mense goeie terugvoer gee op die blyplek, is ek gelukkig. Daar is altyd die ou rykgatte en fiemiesmense wat kla oor iets. Ek bedoel, as een ou oor ʼn muis kla en honderde ander nie, dan glo ek die honderde.   

Ons neem ons eie twee warmwaterflesse en koffiesakkies saam. Dis ʼn luukse want ek drink nie eens sakkies-koffie in Suid-Afrika nie. Ons is sommer Ricoffee-mense (jy kan maar gril, maar onthou mens kry sakkies koffie selfs van Jacobs as jy vol fiemies is). Die ding met oorsese koffie is dit. Dis ʼn rip-off. As jy ʼn Americano bestel (met melk) is dit die naaste aan ons koffie. Maar dis duur en klein. En lou. Selfs ʼn capuchino is te louwarm vir my. Koffie of selfs Hot chocolate, veral in koue weer, moet WARM wees. Punt. Selfs ek het my trots.

Ons vat beskuit saam, cup a soup en selfs soms pasta. Enigiets om geld te spaar daar anderkant – ek weet dis bietjie dik vir ʼn daalder vir party mense, maar as jy somme begin maak, spaar ons derduisende rande. Byvoorbeeld. Vier mense vir 14 dae ʼn koppie koffie drie maal ʼn dag, want dis lekker koel daar anderkant in die tyd wanneer ons gaan. Tussen seisoene. As jy dit uitwerk teen 2 euro’s (en dis goedkoop vir koffie in Europa) dan spaar ons oor die drieduisend rand. As jy by ʼn duurder restaurant gaan sit – tot 5 Euro’s ʼn koppie koffie dan spaar jy nog meer. Eet beskuit vir ontbyt, dan spaar jy sommer nog verder.

Ek het met ons eerste toer van die pakkies Oats wat jy met kookwater aanmaak saamgevat, maar op dag drie, was die kinders naar daarvan. Ek het dit nog ingewurg om ʼn punt te bewys, maar selfs ek kan daai gegeurde pakkies Oats nie meer vandag inkry nie.

Middagetes is gewoonlik brood en kaas/koue vleis wat ons by ʼn tipe Spar koop en iewers met ʼn pragtige uitsig oor ʼn meer of ʼn vallei sit en eet, want piekniektafeltjies langs die pad is volop in Europa (en veilig). Ek kies gewoonlik slaapplekke met ʼn kombuis soos die jeugherberge wat ʼn gemeenskaplike kombuis het waar mens kos kan maak, of privaat B&B’s of gastehuise. Pasta maak ons met ʼn ander sous elke aand, ook bestanddele wat ons by die Spar koop. Ons koop daar ook koeldrank, sap of wyn en bier. Goedkoopste.

Ek beplan en bespreek die hele roete op google maps, met behulp van toerprogramme, idees en roadtrips wat ek google en sien waar is die beste plekke om te stop vir ons voorkeure. Ons gesin is lief vir ou kastele en kerke, museums, begraafplase en die see en mere, nie soseer die stede nie, maar die antieke gedeeltes van die stede en die kreatiewe klein winkeltjies is kos vir ons siele. 

Dit is ons in 'n neutedop!

Groete René van Zyl

Hartbeespoort, Noordwes RSA

Eposadres: 

imaginemoonstones@gmail.com

renevanzyl101@yahoo.com