2021: LIEFDE IN DIE BOENDOES EN STRANDWOLF

2021 is hopelik 'n beter jaar as 2020! Ja, ek weet ons moes almal n bietjie rus van onsself en die wêreld en die virus, maar nou kan ons hopelik weer n bietjie leef!

Sover kom daar twee van my Romanzas in 2021 uit: 

(Beskikbaar by lapa.co.za - as boek of e-boek of by Graffitiboeke.com of Amazon.com)

LIEFDE IN DIE BOENDOES (Maart 2021) 

Tydens ʼn werkekskursie na Botswana moet die bleeksiel joernalis, Jani Kleinhans, besluit of sy jag gaan maak op die aantreklike toergids, Ruan, wat haar emosies lelik deurmekaar krap. Of moet sy liewer veilig in haar groef bly en tevrede wees met die perfekte lewensmaat wat tuis vir haar wag? Daar is egter ʼn meer ervare broekjagter in die geselskap, Tersia, wat lyk of sy al die truuks ken om ʼn man te vang. Vraag is: gaan sy Jani se hand in die as slaan of gaan Jani genoeg waagmoed hê om te veg vir wat sy wil hê? Verder is daar genoeg misverstande aan die broei wat dreig om haar hele plan omver te werp en sy besef dit nie eens nie.

STRANDWOLF (JUNIE/JULIE 2021)

Tala Robberts, met haar donker hare, vreemde rituele en Rooi Indiaanse bloed, vlug van vreeslike herinneringe en mense wat haar jongmenslewe gesteel het. Sy land met haar vyfjarige seuntjie op ʼn Wes-Kaapse stranddorpie, Strandloper, waar sy net alleen gelos wil word. Die jong predikant op die dorp is gefassineer met haar vreemdheid en spiritualiteit, terwyl ʼn regte wildewragtig-strandloper haar nuuskierigheid aanwakker en haar hart bokspronge laat maak. Voor sy haar kan keer, is sy stewig gewikkel in almal se wel en weë en haar emosies is 'n warboel.  Watter keuse sal sy maak om vir haar en veral haar seun die regte toekoms te verseker? Gaan sy die foute van die verlede herhaal of gaan daardie verlede haar eendag inhaal?

             

En net miskien kom daar later vanjaar nog n Romanza uit... hou duim vas ... 

en dalk nog n verrassing of twee..